李逸朗享受one man騷

去年，李逸朗花了大半年時間留在內地拍劇，因此中港兩邊飛對他來說已是家常便飯，李逸朗說：「因為要上北京，唔知幾時先返，所以好想盡快出碟，如果唔做唔知幾時可以做！」一手包辦MV導演、創作總監及歌手，更有份填詞，雖然辛苦但他非常享受製作的過程：「我覺得自己係主觀派，成隻碟都冇添加任何意見，全部都係自己負責，真係好開心！」

思家患情緒病

回想去年孤身上路到內地拍劇，倍添愁緒，原來李逸朗也有段難過日子，他直言：「我當時真係拍到有情緒病，暴瘦咗十幾廿磅，都唔知咩原因會咁，可能真係離鄉別井太耐，當時北京天氣好凍，經常落雪，除咗片場同酒店根本去唔到其他地方，覺得好似畀人困住咗咁。」

李逸朗現已習慣在內地拍劇的生活。

兩年未有出碟的李逸朗，新EP將於下月推出。

感演技不如人

除了環境，人亦是令李逸朗不安的因素，皆因內地的藝人，自小就接受演技培訓，從未學過演戲的他更加自覺不足：「嗰時普通話又講得唔好，講對白已經覺得明顯有差異，所以令自己好緊張，依家好好多啦，已經習慣當地的生活！」訪問翌日，李逸朗要趕往北京為電視劇《張小五的春天》做宣傳，首個本地藝人的電視劇在CCTV1播出，他坦言心情興奮：「真係好期待，希望多啲導演會留意到我，再搵我拍劇。」

文：音樂組

攝：李柏儒