唐詩詠拍嘉穎情侶檔搵銀

唐詩詠、鄭嘉穎、元秋等主演的無綫劇《鐵馬尋橋》周日播映大結局，雖然劇集收視一般，但口碑不俗，詩詠飾演楚楚可憐的阿雁更備受讚賞。

首次擔大旗做女主角，詩詠謙虛說：「女主角係秋姐（元秋），其實呢部劇係以親情行先，所以大部分都係群組戲，最重要係大家演得開心。」劇中詩詠暗戀大哥哥鄭嘉穎，最終有情人修成正果，她直言起初擔心觀眾未能接受，她解釋：「其實我同嘉穎合作過好多次，但多數都係佢做大哥，驚觀眾好難接受兄妹變情侶，但故事寫得好，嘉穎又教咗我好多演戲心得，估唔到真係有火花。」

事有湊巧，二人都傳剛甩拖，問到有沒有發展可能？她哈哈大笑說：「諗多咗嘞！我哋係好啱傾，佢各方面都好好，但我想做銀幕情侶多啲，可以帶挈搵真銀。」

難忘被強姦傷腳

詩詠自言最難忘是被李天翔強姦的一場戲，原來要付出好多血汗水，她說：「天翔要將我推落草地，但榻榻米唔知點解移咗位，搞到隻腳受傷，之後為就鏡頭仲NG咗好多次，雖然好辛苦，但見好多網友話我演技有進步，仲試過喺街被人讚『Well done』，真係好開心。」

對有網友指詩詠是今年「飛躍進步女演員」的大熱人選，可惜因屬「志雲派」令攞獎機會大打折扣，她淡然地說：「距離頒獎禮仲有好長時間，所以唔會睇得好重，況且咩事都有人揣測，最重要係盡力做好自己，希望得到大家認同。」

詩詠希望與鄭嘉穎（左）合組情侶檔，到各處登台搵真銀。

詩詠與《鐵》劇其他演員近日密密「谷戲」搶收視。（資料圖片）

採訪：專案組　攝影：秦健輝　服裝及場地：Fornarina