鮑姐:今年影后鬥得激烈

去年金像獎影后鮑起靜早前接受訪問,選出今年心水,她直言今年女主角難以挑選,《歲月神偷》的吳君如和《心魔》的惠英紅都演得出色,兩個挑一個實在困難,她說:「今年心水係吳君如和惠英紅,兩個都係大熱,兩個都做得好好,邊個攞我都好開心,小紅演得好好,至於《歲月神偷》因為時間關係,入圍嘅時候未得到好多關注,競逐獎項唔係咁多,係一件好可惜嘅事。」

談到歷屆之最,鮑姐印象最深刻係《新不了情》袁詠儀,她表示:「對一個新人嚟講做得咁好,真係好驚喜。仲有就係《忘不了》嘅張栢芝,佢都真係實至名歸,佢係天生嘅演員,演戲係上天畀佢嘅天賦,真係希望佢生完BB可以出嚟再拍戲,唔好浪費咗佢嘅天分!」