惠英紅：獎座再重都拎得起

惠英紅憑電影《長輩》勇奪第一屆香港電影金像獎「最佳女主角」，事隔廿八年她憑電影《心魔》再度提名「最佳女主角」，她坦言如果今年再拿影后，便是她事業上一個圓滿，她說：「《心魔》帶畀我事業上另一個高峰，第一次拎金像獎影后時只得廿歲，對個獎冇乜感覺，上台拎咗個獎，連謝詞都冇講，獎項背後嘅意義我完全冇感覺。」翌日又為電影開工，獎項差不多忘記得一乾二淨。隨着個人的成長，在娛樂圈經歷過不少風雨，終於明白獎項對演員來說是一個很重要的肯定。

入防潮箱保存

廿八年前一個獎座，為惠英紅帶來了不少名利，事隔多年再拎起已「絕無僅有」的獎座，她感慨說：「以我所知我呢個獎座只出現過一屆，之後無再用呢個。我問過當年最佳男主角許冠文，佢都話唔見咗。所以個獎好珍貴。」外表雖然有點殘舊，但總算保養得完整，她透露獎座是放在防潮箱中收起來，沒有刻意為它粉飾，她說：「個獎座好似一個人張大對手，好有希望同抱負咁，加上佢個頭其實係可以360度轉，好似可以環看四周咁，好有意義。」

惠英紅回想當年奪獎，因年紀太輕沒有太大的感覺。

惠英紅早前獲得金馬獎「最佳女配角」之殊榮。

東方之珠最靚

至於由第十屆沿用至今，由金像獎女神手持「東方之珠」的獎座，惠英紅倍感興奮，她說：「呢個最靚，好有線條美。獎座係用銅鑄成所以好重手，不過幾重手都好我都會拎得起，好希望有機會拎呢個獎，對我係一個好大嘅肯定。」

文：影視組