連凱畫展宣洩負能量
連凱是一個怪人，入行十幾年只讓人知道他懂得拍戲，除此之外，就只有Alive。原來學藝術出身的他畫得一手好畫，稍後更會舉行「處男」畫展，宣洩他對社會的不滿。
連凱入行十多年，除了親友外，就只有吳彥祖、陳子聰和尹子維等幾個死黨知道他原來是畫家。連凱自言是一個要面的人，沒有把握的事情是不會做的，如今他已有足夠的作品，才肯推出個人畫展，一方面向好友交代，另一方面要從他的作品喚醒香港人不要再行屍走肉。
連凱說：「我做咗呢行（娛樂圈）十幾年，不嬲都唔會宣傳，我唔會講畀人聽我有幾叻，但係Alive佢哋幾個成日問我既然畫得一手好畫，點解唔開畫展呢？我係一個要有把握先去做事嘅人，今日我知道我有呢個把握，所以就去做！」
港人腦袋只有錢
連凱自言開畫展另一個目的，就是發洩自己的負能量，望於畫中帶出訊息：「我今次畫展主題係《香港之罪》，感覺會比較黑暗，畫中嘅人只有沮喪，冇乜陽光，係總括我喺香港咁多年見到嘅現實一面，畫畫係將我身體嘅能量釋放，係一個垃圾桶，將負能量釋放。其實現今香港人腦裏就只有錢，所以理想同憧憬都冇晒，真係唔想香港人從此變得行屍走肉。」
自言投資接近六位數的連凱，他透露畫展將會在香港及北京舉行，香港的畫展，除了邀請Alive三子外，更會邀請陳自強和成龍出席。
文：專案組 攝：吳文聰
髮型：Vic Kwan@Hair Culture
場地：Agnes b.Le Pain Grille Restaurant