梁漢文被爆瞄半裸洋妞

Big4四子安仔、健仔、蘇康及Edmond攜手為無綫主持新清談節目《Big4大四喜》頂替《志雲飯局》，草蜢為首集錄影嘉賓，笑說：「佢哋大四喜，我哋小三元。」他們指節目形式與《志雲飯局》完全不同，健仔笑言齋吹（水）冇飯食，冇送禮，不怕被查。

安仔攬住冰桶嘔

草蜢笑言七子七嘴八舌，事前毋須對稿，蔡一傑笑說：「定咗題目都會離題。」蔡一智笑言會大爆四子當年瘀事，傑仔先爆最愛面子的安仔舊事：「佢話過唔會喺人前飲醉，嘔都唔會畀人見。當年安仔喺梅艷芳台灣慶功宴上，攬住冰桶狂嘔，仲邊嘔邊話：『冇啦，衰晒，慘啦。』」 即時笑爆全場。

蘇永康坐「豬籠車」

Edmond就被智仔大爆當年到蘇梅島旅遊，當知道沙灘有無上裝女郎，Edmond就對智仔說怕有生理反應，講好大家互望，智仔笑說：「我哋走過三個無上裝洋妞身邊，Edmond對眼向下係咁睇住，又話正人君子，又話目不斜視！」

之後草蜢又憶起當年與蘇康在屋邨球場被差佬查身份證（ID），因為無帶ID要坐「豬籠車」返差館，這些都是他們的開心回憶片段。

四子透露正邀陳奕迅亮相任嘉賓，因四大唱片公司與無綫交惡，Eason正在爭取當中，還有熱爆台灣的「台版Susan Boyle」林育羣亦答應亮相，預算五月來港。

文：音樂組