方中信自我睇淡做追鋒族

今屆金像獎的「最佳男配角」候選人，既有老戲骨馮淬帆，又有出爐亞洲電影大獎「最佳男配角」謝霆鋒，二人越級挑戰方中信、梁家輝及張震三位影帝。

梁家輝再攞會膩

屬電影頒獎禮常客的方中信，今年憑電影《竊聽風雲》提名角逐男配角獎，談到四位對手的參賽作品，方中信笑言睇好霆鋒，他謂︰「講真話，參與得比賽，邊個成數高係知嘅，我覺得今次霆鋒喺《十月圍城》入面做得唔錯，佢靚仔又有型，肯剃頭演出已經係好演員表現，成功咗第一步，同埋佢都幾打得。」他更以專家口脗分析獎項︰「如果再畀梁家輝攞就有啲膩，因為佢又係影帝，超晒班！演技都已經公認係好，馮淬帆唔係唔好戲，但應該係霆鋒嘞！畀啲鼓勵佢哋啦！做呢行冇邊個唔想攞獎，我好幸運，攞過就滿足。」

當年憑電影《旺角黑夜》榮升影帝級，方中信指「影帝」這個名銜對他來說只是多了個外號，笑言一向工作量也不錯，所以拿獎前後沒有太大分別，就連酬勞也沒有大幅度增加，方中信還以「高不成低不就」形容自己於影圈地位，但表示自己從沒想過要大紅大紫，只會把握每個機會，他認為收入足夠養活妻兒，對自己來說已算有交代。

見到個女就冧晒

另外，方中信近年於內地甚吃得開，他不諱言內地酬勞的確比本地多，惟已成家立室兼有名歲多的女兒，方中信每次出埠拍戲，均以極速時間完成，更謂︰「返到屋企見到個女，咩都冧晒，依家連夜街都少出，最遲十點幾就會返屋企。」

文︰影視組　攝︰黎志輝