裙星示範
春夏大熱的Above the knee連身裙和Open-toe高踭鞋是最佳配搭，只要找對了裙子的款式，跟手配對Booties或者Lace-up pumps，不用費神搞Mix & Match，如此方便，難怪女星們對這兩項潮物都照單全收，樂於作真人示範。
5分梁詠琪
條裙睇上去好似有啲鬆，唔係好啱身，如果條花腰帶係黑色可以襯番對鞋。依家粉紅襯黑，搞到佢睇落去似阿太，冇咗平日佢有嘅型格feel。
9分陳慧琳
呢隻藍色好襯佢，條裙嘅Thigh length賣點係今季嘅Must-have item，突出佢嘅身形比例，好好睇，露趾鞋望落去有啲鬆，但整體絕對係一種Perfect carry。
7分林嘉欣
整個Style好Match佢嘅才女氣質，襯一頂Straw hat好有法國味道，加上今季特別興嘅Open-toe booties，Subtle 得來又唔會太誇太搶，啱啱好。
8分山田優
好Pure好Clean嘅感覺！條條嘅肉色薄紗用料，加上荷葉邊嘅設計都好襯佢，整體配襯得好大方，完全突出自己嘅身份，又尊重到場合，好有智慧嘅配搭。
6分泳兒
條裙本身係一件頭過嘅One piece dress，定係玩Layering？如果係自己玩Layering，就有啲Over！因為印花本身已經好靚好Strong，保持簡潔就已經好好睇，而對鞋就好沉重，可以考慮用肉色代替。
7分蔡卓妍
本身條裙好靚，好有60's style，都Match到佢嘅髮型。但敗筆在對Skin color嘅鬆糕鞋，搞到睇起嚟有啲鈍，如果着番白色或者黑色嘅露趾高踭鞋，或者肉身嘅Leather booties，可以攞滿分。
7分何超盈
單睇配搭，撞色玩得幾出色，掌握到今季See-through而唔暴露嘅特色，Well done！不過佢個眼妝太誇張，顯得佢太瘦，睇落唔夠健康，可以Tone down番少少，效果更自然飽滿。
7分何超雲
佢之前成日Biker或者墊膊同埋爛牛仔褲，呢身打扮睇落去令人眼前一亮，畢竟佢係十八廿二，重手啲嘅少女味係佢哋嘅專利！
設計師檔案：
於1996年創立自家品牌SPY Henry Lau的本地著名時裝設計師Henry Lau(劉志華)，曾為梅艷芳和李克勤設計演唱會戰衣，亦曾為何韻詩設計舞台劇服飾。2000年，Henry致力進軍國際市場，曾在悉尼、杜拜、東京和莫斯科開騷。去年底，Henry在深圳中信城一連開兩舖，正式進軍中國市場。