陳奕迅high爆放屁：濕濕哋

前晚Eason舉行尾場個唱，雖以一把爛聲開場，但愈唱愈入佳境，鬼馬的他甫開場即預告會放屁：「神仙放屁，非同凡響。」之後竟將咪擺在屁股位，抵死說：「未試過喺紅館用支咪放下面發聲。」隨即當眾放屁發出「砵砵」兩聲，浮誇地高叫：「Oh！My God！濕濕哋。」之後用件衫拭咪，又抓屁股，笑爆全場。

破紅館超時紀錄

high爆的他又扮青蛙跳兼瞓地，表現亢奮地說：「唔明啲人點解要索K，望住一盞燈已經好high，點解要畀錢，蠢蠢。」台下捧場的舒淇、容祖兒、何韻詩、劉浩龍等同樣high爆，阿詩和祖兒本隔着舒淇坐，之後兩人索性並排睇騷。而Eason唱《天祐愛人》時問囡囡康堤識唔識唱，老婆徐濠縈做出瞓覺手勢，祖兒就扮喊，指康堤扭眼瞓，慈父Eason說：「你眼瞓走先啦。」

陳奕迅將咪高峰放在pat pat，「砵砵」屁聲響徹全場。	陳奕迅公然在台上抓屁股，不顧儀態。	演唱會稀客舒淇現身捧場，還擺出鬼爪甫士。

唱到欲罷不能的Eason，encore三次至凌晨12時50分才完騷，超時逾一粒鐘，破了當年歌神許冠傑12時45分完騷紀錄，成為紅館史上超時最長的歌手，累主辦機構被罰20萬。

祖兒與何韻詩打破禁忌，拍住睇騷。

徐濠縈將一家三口合照放上微博，大晒幸福。

滿腔憤怒難宣洩

完騷後Eason出席慶功宴，問他把聲有冇事？Eason說：「每日接受日本仁神術能量治療，醫師話我心靈創傷最大，本身有好多憤怒，因性格問題選擇唔放出來，結果積聚喺橫隔膜對上，反射出現喉嚨痛。（你有心靈創傷？）以前好多嘢睇唔過眼，搞到開口夾着脷、出口傷人，但唔係特登，呢幾年算啦，結果積埋令喉嚨發腫，要接受長期治療。」

問有冇諗過停騷休息？Eason說：「從來冇諗，自己心理質素幾好，騷要繼續，最多歌降key。（唔怕有後遺症？）冇諗咁多，今日事情今日做，心態冇負面。」此外，徐濠縈昨日將一家三口在台上的合照放上微博，大晒幸福。

採訪：音樂組