超雲靠把口馴服男友
情侶拍拖唔多唔少都會互有要求，有乜嘢唔啱就要互相提點，咁感情先會更加好。上星期八太喺銅鑼灣見到何超雲同男友Andy拍住拖去攞車嗰陣，無意中聽到超雲突然向男友撒嬌話：「你要學識尊重！」Andy即時乖乖，仲幫女友將戰利品放去車尾箱，認真聽教聽話！
賭王何鴻燊同三太陳婉珍所生嘅長女何超雲，同「皮草商太子爺」王大業（Andy）相戀短短數月，雖然成日畀人影到佢哋拍拖行街甜蜜撐枱腳，但超雲最近喺公開活動上，竟然話同男友感情尚未穩定，所以遲啲先會帶男友返屋企探爸爸。
食飽飽凸小肚腩
今個月將要返英國讀書兩個月嘅超雲，為珍惜同Andy見面時間，早幾日同男友去咗銅鑼灣「濕平」兼食飯。當晚十點幾，八太喺開平道見到啱啱食飽飯嘅超雲，着住條牛仔短褲、孭住個價值逾三千蚊日本品牌TATA Baby嘅粉紅色手袋，同男友拍住拖去街頭攞車。點解八太咁肯定佢哋食飽飯？睇吓超雲着住嗰件貼身衫，凸咗個小肚腩出嚟就知啦！
為女友做「阿四」
超雲同男友肩並肩行去攞車時有傾有講密密斟，超雲仲突然撒嬌同Andy講：「你要學識尊重嘛！」Andy聽完女友咁講，即時馴如綿羊咁款，笑一笑之後仲將超雲手上袋戰利品放入車尾箱，然後揸車送女友返閨。