Eason收錯料累錢國偉曝光
陳奕迅（Eason）前晚個唱吸引被廉署調查的錢國偉出關捧場，可惜被鄭伊健「連累」令行蹤曝光。而Eason為了捍衞家庭，當着逾萬觀眾面前否認離婚：「冇啲咁事！」
陳志雲五人幫涉貪被廉署調查後，近日逐一蒲頭！無綫監製錢國偉前晚終被本報拍得與好友鄭伊健現身紅館睇騷。穿上黑色外套的錢國偉表現低調，不時將衣領拉高頂住下巴，可惜卻被伊健連累行蹤敗露。事關有觀眾大嗌Eason似樓南光，怎知Eason聽錯是「浩南哥」（伊健於《古惑仔》的角色），即指着坐在VIP位的伊健說：「真正嘅浩南哥喺度。」變相令坐在伊健旁的錢國偉曝光。
否認離婚
由於觀眾對伊健在座起哄拍掌，Eason即扮酸溜溜說：「佢坐喺度就有掌聲咁受歡迎，試吓我坐低有冇掌聲先！」當他坐下時全場拍掌，Eason得戚說：「我都有絕招。」接着表現一招蜈蚣彈，還自詡：「我係樂壇洪金寶。」引得觀眾大笑。
說到要多謝重要的人時，歌迷大叫徐濠縈，Eason笑說：「老婆太重要唔需要成日提，費事咁肉麻，亦唔使咁肉麻。」當他多謝演唱會服裝設計師何志恩時，Eason終忍唔住激氣說：「最近有本雜誌話我同個女人去街，就係佢嘞，仲話我同太太辦離婚手續，根本冇啲咁事，大家唔好買嗰本雜誌！」
大玩不文
鬼馬的Eason介紹樂隊時竟玩粗口諧音，笑言結他弦聲似刁刁聲，自己又好似聽到個「母」字，將「刁」、「母」結合就變粗口諧音。另外，有歌迷用激光槍射他時，Eason又玩不文：「你射下半身冇所謂，你射我邊度，我就用邊度射番你。」令全場笑破肚皮。
文：音樂組