G.E.M.夠秤預告秘密拍拖
昨日是兒童節，人氣女歌手G.E.M.出席卡通兔Miffy的活動時，笑言今年滿18歲已不再是兒童：「上年都仲收到兒童節禮物，有個朋友喺舖頭見到有我個樣嘅文具，就買晒成套畀我，我本來都幾開心，不過公司話原來係盜版，真係唔知好嬲定好笑。」
現場見G.E.M.跟歌迷大玩遊戲，並齊齊跟卡通兔Miffy影大合照，童真滿載。
G.E.M.昨日於微博寫上感言，暗示有心靈感應的幸福，未知是否蜜運中？她回應說：「唔係，只係我寫緊首歌，會將小王子呢個故事寫到好慘咁，（搵到男友未？）搵到都唔會講啦，拍拖我想保留，（瞞婚？）我想25歲之前結婚，不過我係超恨結婚嘅人，如果真係嫁人，會開心到唔想隱瞞。」