Fiona爆祖名：佢做人都假
薛凱琪（Fiona）與房祖名的緋聞已成過去，前晚二人為新作「重逢」，未有尷尬之餘，還於首映後孖必開派對，對祖名被讚演技進步，Fiona即嘲說：「因為佢做人都假囉！」
Fiona、祖名、周秀娜、江若琳等前晚出席電影《分手說愛你》首映，同場還有打孖到的Donald和張詠恩，及開始見肚的準媽媽阿Yu等。前緋聞情侶Fiona與祖名不但沒有尷尬，還有說有笑，Fiona被問到與祖名重逢感覺如何？她笑謂：「唔覺得要用呢個字眼去形容，因為都冇拍過拖，我知佢有段長時間唔喺香港，但都有喺MSN聯絡。」
而久未露面的祖名發福不少，透露居於台灣半年，因食得好又住得好所致，笑言與Fiona再見面亦不尷尬，更重提女方早前於活動上誤把祖藍說成他，他謂：「唔知點解我個名變咗房祖藍，（即係你喺佢心中重要囉！）OK啦！我今個月出碟佢好期待囉！」
唔小心做媒人
正為找MV女主角人選而大感煩惱的祖名，表示不欲找合作多次的Fiona，問到會否找老友周迅？祖名笑謂：「我驚到時首歌令佢仲紅，（佢同王爍甩拖喎！）係囉！不過我冇安慰，兩個都係我朋友，有冇新歡就唔知，下次幫你問吓佢。（仲做唔做媒人？）冇特登，上次都係唔小心。」
鄭融感動流淚
首映後，導演黃真真拉大隊開P，率先到場的祖名，特別等Fiona換裝過後才一同接受訪問。Fiona透露首映觀眾反應不俗，期間還不時聽到觀眾感動流淚的聲音，連老友鄭融也是當中一分子，更謂：「阿融問我點解祖名啲戲好咗咁多，我咪話因為佢做人都假，呃得人多囉！哈哈！」在旁的祖名聞言後只不斷搖頭嘆息，場面惹笑。
文：影視組 攝：鄭家俊