狄娜敏感專訪出生天

狄娜逝世，不少傳媒連日來爭相翻炒這位奇女子生前做過的訪問，有線昨日聲稱將會播出「狄娜最後的專訪」，據知是狄娜兩年前做了、但未被安排播映的訪問。有線否認此刻才播出這個塵封足本訪問有抽水之嫌，只想向狄娜致敬云云。

剪輯不同嘉賓訪問

有線執行董事趙應春昨日在電話中說：「個訪問○八年做，主題係『中國改革開放三十年』，除咗狄娜，我哋仲搵咗好多相關知名人士做訪問，當年負責同狄娜做訪問嘅記者係呂秉權。狄娜喺個訪問講咗好多個人睇法，成個訪問好長，但當年個專題係綜合唔同嘉賓嘅訪問剪輯而成，所以唔可以將狄娜訪問原原本本播出。不過，既然呢位嘉賓言論咁大膽，睇事物又咁透徹，加上佢人已經離開咗，有線今晚（五日）播出佢原裝足本訪問，好大部分內容係從未見街，作為向狄娜嘅一次致敬。」

當年唔播因唔啱用

以言論辛辣著稱的狄娜，在訪問中曾提及中國歷代領導人及鮮為人知的經歷，包括改革開放期間際遇、做間諜為國家收集情報及經商無往而不利的秘密等敏感話題。

有線否認話題敏感而令訪問雪藏了兩年。趙說：「有線從來冇立場，亦唔考慮敏感唔敏感。狄娜喺訪問度只係講佢個人對文革變遷嘅睇法，當年唔播因為唔啱用。狄娜見證咗中國幾十年變遷，係個有分量去講呢個話題嘅人。我哋唔覺得播有咩問題，就算播都只係代表狄娜個人意見，唔代表有線立場。」

文：影視組