洪卓立出動阿媽溫情谷碟
洪卓立（Ken）日前推出新曲加精選《Taste of Love》，並舉行小型音樂會，這是Ken病後復出第一炮，故不容有失，在主打歌《你好嗎》MV中，阿Ken更叫阿媽上陣，大晒母子情，他說：「我喺入面係個駕駛『幸福號』列車嘅司機，載住唔同乘客去唔同地方，就好似人生唔同階段咁。」
碌爆友情卡
為配合主題，Ken碌爆友情卡，請來中學同學、舊同事、參加英皇新秀時的戰友及初出道時的同期新人演出，而王牌當然是Ken媽，對此Ken興奮說：「真係好開心，請到佢哋嚟參與對我嚟講意義重大，佢哋喺我生命裏面都有唔同嘅影響。有讀書時期放學柴娃娃一齊去唱K嘅同學，令我愛上唱歌，又有我第一份地產工嘅同事，令我由大怕羞變成小怕羞。」Ken又感激同期新人林威晨、湯怡及齊齊參加新秀的好友一直互相勉勵。提到媽咪粉墨登場，Ken就說︰「媽咪當然係無論任何時候都會陪住我，好多謝佢哋每一個，真係好感激。」
而在拍攝唱片封套當日，正好是阿Ken生日，公司同事特別為他準備神秘派對，鍾舒漫與湯怡更為他送上生日蛋糕，而英皇高層霍汶希（Mani）就託同事送上利是，認真萬千寵愛。
文：音樂組