狄娜囑愛兒好好活着

狄娜05年患子宮癌，一直與病魔搏鬥，早前曾完成大手術，便返家休養。據悉狄娜病情一直反覆不定，由於不少記者在養和醫院守候，因此一直未見其「子」馬天如（Mike）蹤影。據了解，由於Mike不方便前往探望，兩母子只能透過視像見面，反而親友則曾到醫院慰問。

靠藥物協調

外界對狄娜的情況深表關注，於一星期前，本報記者曾致電狄娜，當時已改由一名親屬接聽：「狄娜知道邊個搵佢，知道你係佢老朋友就坦白講，因為佢休息緊，擔心一講電話就唔捨得收線，所以由我代聽。」當問到狄娜病況時，對方說：「佢做完大手術，依家有後遺症，消化系統要靠藥物協調，呢排比較攰。（佢近況點？）OK啦，早前陳志雲打過電話嚟，當時狄娜精神好好，仲同志雲傾咗十幾分鐘。」

與病魔搏鬥的狄娜，去年現身為新著作宣傳。

狄娜為無綫主持《大國崛起》節目。

而狄娜助手昨日接受本報電話訪問時，問及狄娜病況，她說：「佢依家喺醫院休養緊，佢食少咗嘢，所以啲腸唔郁，去唔到洗手間，要靠食藥幫助，醫院有好多完善儀器，加埋護士照顧，好過喺屋企冇人照顧，佢個病況問題唔大，有事嘅話都呃唔到大家。」

曾經命懸一線

另外，狄娜較早前出院返家休養，接受本報電話專訪時表示，在去年的一次大手術過程中曾發生問題，令病況危急致命懸一線。

狄：狄娜　記：記者

記：手術過程出咗問題？

狄：頭兩次開刀係飛來橫禍，手術過程出現問題，搞到腸發炎，當時情況危急，可以話喺鬼門關走出嚟。

記：「仔仔」當時乜嘢反應？

狄：佢好擔心我，我同個仔講，有乜嘢都放心，唔使太擔心我，我要佢生活開心，當時個仔一路喊，不斷叫醫生救番我。

記：想見到「仔仔」結婚？

狄：我冇着眼喺呢度，只想佢同另一半達到心靈合一。

記：同「仔仔」住？

狄：雖然大家關係親密，但我同佢及佢女朋友住上下層，各有各空間，但又可以方便照顧。

記：你哋三人關係點？

狄：相處得好舒服，好似朋友，佢女友好乖好純，都係叫我做「媽咪」。

記：好多人探你？

狄：我知好多人想探我，但我瘦咗好多磅，唔想出鏡住，好似一個阿婆咁，有乜好見？（服中藥？）我食哥哥開嘅中藥調理身體，平時食得好清，我鍾意飲魚湯。

文：專案組