Juno脫離現實減壓

麥浚龍(Juno)平時工作繁忙,但最近他為立體動畫電影《馴龍記》配音,竟發現可以在配音過程中,投入到動畫中另一個兒童世界,暫時脫離煩囂的都市,好好休息一番。

Juno在圈中有多線發展,除了唱歌、拍電影、廣告外,亦是品牌的負責人,工作之多令他患上都市病不時精神緊張。最近他為立體動畫電影《馴龍記》配音,雖然連續五日每天花十小時在配音工作相當辛苦,但他竟發現了原來配音工作能令他放下緊張的生活,投入到動畫中的另一個兒童世界,讓他身心好好休息,他說:「其實配音真係好好玩,會講一啲平時自己唔會講嘅嘢,好似超乎咗現實變咗另一個人咁,壓力都冇咁大。」戲中他負責聲演年輕人,但因個人聲線比較沉厚,故經常需要提高聲調配合,他說:「每日都要調高把聲去配,都好辛苦,但都係值得嘅。」

嫌蒼井空男仔頭

麥浚龍揚言今年主力電影工作,去年先後拍了《維多利亞壹號》和他原創的故事兼自演、監製的《剖術者》,令他大叫過癮。在《剖術者》中,他飾演蒼井空的男朋友,二人合作後成為好友,問到有否機會發展?他表示覺得對方很男仔頭,未有想過。他說:「我承認佢係一個好專業嘅演員,但只會是合作上的拍檔。(抗拒異地情?)我又唔係抗拒,但呢啲隨緣啦。」他透露最希望喺三十歲前生兒育女,唔想與下一代有代溝。

採訪:影視組

髮型:Edmond @ Private i

化妝:Khaki @ Mae Von

場地:銅鑼灣Zense