Eason無懼緋聞大唱Kay歌

Eason演唱會首場於昨晚八時四十分揭幕，全場座無虛席，除太太徐濠縈及女兒陳康堤外，久未露面的Eason父親陳裘大亦親自捧場；一班圈中好友容祖兒、何韻詩、梁漢文夫婦、余文樂、何超儀、劉浩龍及黃偉文等亦令現場星光熠熠。現場以四面台設計，舞台以多個巨型齒輪堆砌而成，Eason為配合個唱的「雙面」主題，更穿上鴛鴦色西裝造型出現，令人眼前一亮。

老貓燒鬚狂甩嘴

未知是否開騷心情太興奮，演唱頭三首歌期間，Eason竟老貓燒鬚多次甩嘴，連他也不禁尷尬得頭擰擰失笑。Eason竟無懼與謝安琪（Kay）的「緋聞」，選唱她的《囍帖街》。當音樂響起時，全場觀眾都起哄大叫，而Eason唱《七百年後》時，阿徐亦有拿出相機為台上的老公及女兒康堤影相。Eason演繹王菲的《約定》也有唱錯歌詞。

對於連番失誤，Eason解釋每次踏上舞台都很興奮，今次更令他喊出來，有「吹水佬」之稱的Eason，自嘲多嘢講，愛說話多過唱歌，就如主題DUO一樣，他的另一面是愛睇戲、看書及聽音樂、易哭的人，但人前就不會輕易表露。

Eason個唱的舞台設計以多個巨型齒輪堆砌而成。

Eason拿着結他自彈自唱，盡騷才華。

康堤眼瞓伸懶腰

Eason台上分享當年舊事，他謂：「有次做電台訪問去咗出面露台食煙，後面有把沙聲同我講『我都戒咗煙，你都應該戒，你把聲咁靚，要錫住把聲！』我聽完即時呆咗，我冇畀到反應佢，我真係好後悔，如果可以同佢講，我會話『哥哥，你身體好嗎？』」語畢Eason唱出哥哥的《寂莫夜晚》，更流下男兒淚，氣氛感人。不過，台上的Eason表現傷感，康堤卻在台下伸懶腰打呵欠，相映成趣！

阿徐及康堤當然列席，何超儀（左）則陪伴在旁。	陳裘大	好友支持
一些日本粉絲遠道而來，撐偶像開騷。

文：音樂組