方皓玟睇通樂壇白眼當醒
創作歌手方皓玟（Charmaine）不經不覺入行十年，由於歌唱事業不是大紅大紫，Charmaine透露曾遭白眼，幸好天生樂觀及積極，她說：「做人要望遠一啲。」
Charmaine曾簽約多間唱片公司，亦舉行過音樂會，為給歌迷新鮮感轉了多個造型，但星途仍是一般，數數手指，今年是她入行十年，問到這十年的得着？她說：「得到一班好朋友，同埋錯誤中學習。（十年睇通啲咩？）呢行好公平，冇資格就會淘汰，我覺得好好玩同好enjoy。」
化為動力
日前簽約新唱片公司的Charmaine強調對樂壇充滿信心：「我份人好樂觀同積極，冇嘢係唔得，亦都可以話我硬頸，我對樂壇唔會死心，因為呢行仲有好多好叻、用心去做嘢嘅人，只要肯努力一定有人欣賞。（有冇遇過畀人白眼？）一定有，睇吓點轉化，我當佢醒我囉，至少佢肯白你一眼，咪將呢啲化為動力囉，尋日嘅事已經過去，人要望遠啲。」
幸福歌手
Charmaine承認不是聰明人，她說：「只係想做鍾意嘅嘢同埋好直接，做得好與唔好我都好大方去接受。」她笑言新公司以「型」字行頭：「兩個老闆都為我付出，一個就做音樂，一個就做設計，相信我係全世界最幸福嘅歌手。」
文：音樂組
髮型：Jimmy White@Chin.G