龔嘉欣同梁烈唯咀嘴冇feel
龔嘉欣為拍攝婚紗廣告，不惜與梁烈唯擺出多個親密甫士，期間龔嘉欣更獻出螢幕初吻給對方，但事後她表示搽了太多潤唇膏，所以沒有實質感覺。
無綫藝人龔嘉欣與梁烈唯（唯唯），早前到昆明、麗江拍攝多輯婚紗廣告，期間二人在攝影師要求下擺出多個親密甫士，當中包括有咀嘴、攬腰、拖手、面貼面等，而首次拍攝婚紗廣告的龔嘉欣，更為廣告獻出螢幕初吻給唯唯，令她感覺難忘。
情侶檔搵真銀
事後龔嘉欣表示與唯唯分屬好友，故與對方拍攝親密鏡頭感覺不尷尬，她謂：「平時我同唯唯都玩得好癲，不過就好少咁親密，所以有少少怕醜，但就冇尷尬，唯唯好細心，因為婚紗啲裙尾好長好重，佢好有風度成日幫我拎住裙尾。（同唯唯拍咀嘴鏡頭有咩感覺？）好難忘，因為今次係我螢幕初吻，不過只係掂一掂個嘴，而且我搽咗好多潤唇膏，所以實質冇乜感覺。」而拍完婚紗廣告後，龔嘉欣與唯唯更多了情侶檔搵真銀機會。
十年後先結婚
問龔嘉欣對於結婚有何憧憬？她表示希望可以有童話式婚禮，周圍布滿「白雪雪」的花，她表示：「依家廿歲，其實冇乜點諗過結婚，最快諗住十年後先結婚，畀多十年時間自己去工作搏殺。」
文：影視組