伊健雪中送炭日日陪老友
伊健跟Wilson相識於早年的兒童節目《430穿梭機》，兩人更經歷過一個飯盒兩份食的艱難日子。昨日伊健現身旺角出席護膚品牌MENARD的「美肌運動學」活動，對於Wilson涉嫌貪污被捕，伊健即時開腔力撐好友，他說：「我有搵佢，佢冇乜嘢，亦冇乜講件事，都係傾吓近況！（有冇探過佢？）我哋日日都見，佢依家得閒嘛！」
生活如常趁機休息
問伊健有否擔心Wilson？他說：「又唔係好擔心，未知發生咩事，佢只係協助調查，好多朋友支持佢，佢幾開心！」伊健透露Wilson以平常心對待事件，生活亦如常，更勸喻好友應在這段期間好好休息，他說：「佢工作太忙，應該休息吓，依家就當放假，未知幾時返工，要等無綫安排！」伊健又指跟陳志雲不太熟，故不方便作評論，但提到好友Wilson時即表示：「我絕對相信佢！」
見得意女孩想生個
另外，大會昨日安排兩名小朋友上台歡迎伊健，伊健甫見其中一名小女孩即表示：「好得意，我都想生番個！」但該小女孩卻被閃光燈嚇得轉身落台大叫「媽咪」，場面十分搞笑，事後問伊健是否想生BB？他卻反問：「我有咁講過咩？係都陳小春先啦！」
採訪：音樂組