袁彌明炮轟似做騷 林敏驄：攣的直不了
陳志雲自被廉署拘捕後一直避見傳媒，令外界對箇中原因眾說紛紜。昨日他選擇於被捕後第六日召開記者會，雖然得到fans在場外舉牌力撐，但仍有不少圈中人覺得陳總過於造作。
袁彌明睇過記招後指陳志雲在會上與做騷並冇分別：「可能佢真係好鍾意見傳媒，知《志雲飯局》停播，冇得再上鏡所以就用呢個方法去滿足自己。」雖然陳志雲整體表現尚算得體，但她仍嫌對方過於虛偽：「如果佢係虔誠嘅基督教徒，主係會打救佢，佢唔好再講嗰啲『真的假不了、假的真不了』，我知嘅事實就係佢被拘捕，佢講嗰啲咩莫名其妙嘅變化，講到好似唔關佢事咁！」
林敏驄之前開Show有邀請陳志雲，被指算是「志雲派」時笑言：「梗係唔係，係我就一早紅咗啦！攣的直不了、直的攣不了！」他事後亦正經表示都同情陳志雲。
白韻琴看畢記者會亦贈言：「正如佢所講，『真的假不了，假的真不了』，若然未報只係時辰未到！」白姐姐更笑指陳志雲做戲比他主持《志雲飯局》還要好看，她又指希望事情盡快水落石出，免得整個電視台變成志雲台。
「沙姐」林建明是「心晴行動」創辦人，之前曾幫助崔建邦治療涉嫌傷人案後情緒抑鬱問題，她亦有從收音機中聽到陳志雲記者會過程，沙姐說：「我覺得陳志雲喺記者會度表現好好，以我過往接觸佢，佢係一個人才，係一個EQ好高嘅人，相信佢嘅情緒都唔會有問題。」