君如拒再露點嚇觀眾
吳君如最近以大熱姿態提名金像獎影后，由於當年她於紅地氈上失手露點即開齋成金像影后，君如笑言當年年輕貌美無妨一露，不過現時怕會嚇親人。而任達華亦笑言若能奪得影帝，會請大家食菠蘿油慶祝。
早前揚威柏林影展的電影《歲月神偷》，於本地上映四天收四百七十八萬票房，成績不俗。電影公司前晚筵開十六席舉行慶功，導演羅啟銳、監製張婉婷、吳君如、任達華、蔡穎恩、李治廷、鍾紹圖、許鞍華等均有出席，場面熱鬧。
謀事在人 成事在天
對於新片票房報捷，任達華表現興奮，問到入圍金像獎影帝的他有否信心？他謂：「成數係有，但謀事在人、成事在天，希望個天對我好啲。（攞到點慶祝？）請晒你哋食菠蘿油同絲襪奶茶。」
君如對於華哥請食菠蘿油大呼「cheap」，揚言若她得獎，會買半隻燒鵝及缽仔糕。她又自稱是專業評審的其中一員，有份參與金像獎投票。談到《神》片入圍多項提名，她滿有信心地謂：「編審同新人就攞梗，男主角我投畀華哥，女主角就冇得投。（戲中兩個仔一齊入圍又點揀？）我好專業嘅，唔話畀你哋聽，同埋都身經百戰，以前好恨攞獎，今次再攞咪錦上添花，攞唔到都唔會黑面。」
年輕貌美 露吓無妨
當年憑《古惑仔情義篇之洪興十三妹》獲金像獎提名影后的君如，行紅地氈時不慎露點，結果開齋封后。問到今年會使出甚麼招數時，君如即拍打記者：「呢啲陳年往事仲提！唔係攞番張相出來登嘛？當年我年輕貌美，露吓無妨，依家唔好嚇親人，唔好令人嘔。」對於有指陳志雲篤信的苗師傅曾向不少圈中人指點，君如亦是其中一人，君如表示與對方曾有一面之緣，更指對方為人低調。
文：影視組