喺澳洲長大嘅宋熙年，憑住標致面孔、淡定表現，當選07年度國際中華小姐冠軍，繼而進身娛樂圈，之後仲獲無綫安排出任節目主持添！唔經唔覺，熙年已經喺香港打滾咗兩年幾，除咗中文進步咗唔少，仲識咗一堆好朋友。
早前晚上九點幾，八太喺中環嘅SOHO區，見到戴住頸巾嘅熙年，同幾位女仔朋友喺食肆附近吹水，似乎係商量緊去邊度開餐，傾咗一陣，啲女仔都未動身，心急嘅熙年索性打電話問朋友意見，仲笑到見牙唔見眼，似乎有好介紹喇！果然，熙年隨即拉大隊入咗附近一間餐廳醫肚，幾時都話，女人最開心都係開餐。