蕭亞軒遇忠心格仔黨 展笑晒Ｖ

台灣天后蕭亞軒唱得又跳得，一向喺香港都有唔少擁躉，加上身為潮女嘅Elva特別鍾情格仔衫，唔怪得每次Elva嚟香港，八太都見一大班格仔fans追住佢。早排Elva母親離世，佢班fans都傷心到陪偶像一齊喊添。

Elva見到格仔黨fans即刻成個精神晒，仲笑笑口逐一影合照。	Elva着住招牌格仔衫，又圍埋格仔圍巾，名副其實「打晒格」，但就冇乜表情喎！	張芸京都係着格仔衫o架！

張芸京受感染

最近頻頻嚟香港工作嘅Elva，早排就同另一位女歌手張芸京嚟香港出席活動，Elva做完嘢後就即刻換番套便服，同張芸京齊齊返酒店休息。對格仔衫發狂嘅Elva，當然又係「打格」示人啦，當佢喺酒店度見到八太時，仲鬼咁開心，舉晒V字勝利手勢打招呼後，先至同助手返酒店休息。不過估唔到跟住Elva返酒店嘅張芸京竟然都畀佢感染，又係着住格仔恤衫，真係「梗有一格喺左近」。

影合照晒親切

隔咗冇耐，Elva又嚟香港做嘢，嗰日佢來去匆匆，現身活動後又換番套招牌格仔衫走人，今次仲連條圍巾都係格仔添，去到機場，一落車Elva已見到大班fans等緊佢，唔知係咪舟車勞頓定係母親離世冇耐，八太見Elva冇乜表情，但當佢見到幾個fans着住佢最愛嘅格仔衫衝上前打招呼，伊人心情即刻好番晒，仲同班「格仔黨」fans有講有笑，影完合照再傾咗成十分鐘先捨得上機，十分親切。