陳慧琳四零藝人晒幸福
【盧坤穎北京直擊】陳慧琳（Kelly）為新國語碟遠赴北京造勢，她將載滿人生兩大喜悅的新專輯跟大家齊分享，希望趕及四十歲前生多個BB，帶着兒女踏上紅館舉行演唱會。
Kelly昨日在北京為新國語碟《微光》舉行盛大亞洲發布會，吸引過百傳媒及粉絲捧場，她更首度獻唱新歌《微光》。
想帶仔女上台
四年沒有出國語碟的Kelly透露早在婚前已開始收歌，她笑說：「錄歌期間經過咗結婚、生仔，揀嘅歌都好開心、好甜蜜，錄嘅時候都冇壓力。（幸福滿瀉？）都係㗎，希望大家聽到我啲歌都開心啲、輕鬆啲，蝦餃仔聽到我啲新歌都會笑晒。」
會上Kelly又獲粉絲送贈鮮花、水晶座，粉絲祝願她將來帶同仔女踏上紅館演唱，Kelly笑說：「我都想，不過驚老公唔畀，我都希望四十歲前生多個BB，湊成好字，等佢哋四、五歲大就帶埋佢哋上紅館。」
變感性添死穴
Kelly獲主持封為「四零藝人」，意思指她冇走光、冇是非、冇緋聞及冇結黨，形象健康得很，她坦言有公司會利用是非、緋聞炒作人氣，幸好她沒遇到這樣的公司：「其實我有畀人影過走光，不過嗰條係打底褲。」Kelly最近變成容易喊的媽媽，主持人踢爆她前晚跟傳媒訪問時，談到一班忠心粉絲，她忍不住又喊，Kelly死撐笑說：「冇，係感動到眼紅紅，其實生完BB後個人變得感性，多咗死穴，以前係經理人鍾珍，依家就係蝦餃仔同粉絲。」