Kama谷行事業線博翻身

Kama去年三月乃首位躋身Tokyo Girls Collection（TGC）的本地o靚模，怎料今年她冇得留低。Kama眼見同行Angelababy、周秀娜及諸葛梓岐在TGC大出風頭，昨日以生病為理由，決定將搵食基地移回香港。

每次出埠都會病

聲勢下滑的Kama昨日與男子組合4anda出席活動，Kama谷胸上陣，將「事業線」表露無遺，配以短褲騷長腿，謀殺龍友不少菲林，總算挽回聲勢。剛從台灣回港的她透露每次出埠都會生病，故經母親勸告後決定返港發展事業。

對於今次沒份行TGC，Kama說：「我冇同嗰邊經理人聯絡，又冇返去。（驚唔驚畀人話你飛出局？）唔會，聽到呢個騷有港模去都好開心。（你係第一個去喎！依家冇份會唔會唔開心？）咁要繼續努力，都唔會失望嘅。（同日本仲有冇約？）唔知簽咗幾耐，當時係公司傾，我只係畫隻龜上去，不過暫時都唔會返日本住。」

拍寫真唔知露乜

決定回港發展的Kama，希望支持者不會變心，還笑言會以「事業線」挽回fans的心。去年曾推出性感寫真集的她，不諱言今年再接再厲。問到性感程度有多激？她謂：「當然唔會露點，露其他嘢囉！不過唔知露咩好，因為上年已經露好多。」

另外，首次擔任司儀的岑潔儀（Zoey），揚言做司儀心情非常緊張，為免出醜人前，故活動前一晚已熟讀司儀稿，做足功課。

文：影視組