Kelly措手不及兩度喪喊
【羅宛君上海直擊】陳慧琳（Kelly）昨日以亞洲代言人身份出席手錶活動，為配合「浪漫時刻」主題，大會播放她與老公劉建浩（Alex）相識至結婚的照片，並有她手抱囝囝劉昇的母子相，Kelly即忍不住兩度喪喊，事後笑說：「殺個措手不及！」
Kelly昨日穿上價值$16,400的Escada火紅色長裙，出席上海舉行的瑞士依波路錶簽約儀式，她在台上甜蜜細訴與老公Alex的「浪漫時刻」：「我哋曾經喺紐約坐馬車，拍拖時成日去紐約一間餐廳食焗鮮帶子。」說時已眼濕濕，接住播出兩人結婚及囝囝生活照時，Kelly即淚如雨下，嚇得司儀急急遞上紙巾，她更眼紅紅自爆老公閒時在家中與她擁抱及講「I Miss You」，Kelly說：「呢個係浪漫時刻。」
勾起不少回憶
事後Kelly指一早知道大會會播有關相片，她說：「真係殺個措手不及，一講嘅時候已經知衰，不停咁忍，好彩中間播吓片，點知一播BB相真係忍唔住。」問Kelly在家中會否攬住囝囝喊？她說：「唔會，冇咁變態，頭先真係勾起唔少回憶同人生唔同階段，好感動。（係咪好耐冇喊？）係呀，之前出活動都冇啦，今次內容講到我人生幾美好，所以先咁。」
讚老公有情趣
Kelly表示Alex不時下廚：「返到香港都搵唔番喺紐約食嘅焗鮮帶子，佢整得好好味o架，味道90%似，個樣有100%似。」Kelly在台上透露Alex曾在情人節送上214支紅玫瑰，她說：「依家送其他嘢。」隨即又大讚老公說：「佢Keep住浪漫，唔錯o架，佢好有情趣。」
Kelly透露囝囝新年𢭃了五位數字利是，又大發嬌嗲說：「過去情人節都係同埋佢過，依家佢先係最大情人，最緊要佢Like。」早前曾透露為免囝囝在家周圍撞，有意安裝防撞綿，Kelly說：「老公整咗，搞到間屋核核突突，又紅又綠又藍，不過我覺得佢呢個舉動好浪漫。」