人氣女模Jessica C.與男友Sergio拍拖兩年多，雖然今個農曆新年男友要赴意大利發展事業，但無損兩人感情，Jessica C.為了將感情「保鮮」，親自炮製愛心湯圓，為遠方的男友送上甜蜜愛意，還祝天下有情人終成眷屬。
首次炮製中式湯圓的Jessica C.表示，起初對湯圓製作毫無概念，幸得在旁師傅悉心指導，經過幾番失敗後終見成果，還被師傅大讚很有天分，她聽罷即得戚地說：「It's so easy!」
請假製造驚喜
因男友遠赴意大利發展模特兒事業，令這對小情侶分隔兩地。雖然男友趕不及回港與她過年，但Jessica C.絕對是窩心的好情人，除預備禮物外，還向Model One模特兒公司請假一星期，到意大利給男友一個驚喜。她說：「農曆新年工作量唔多，男友叫咗我好多次過去探佢，但我每次都扮唔在乎，話請唔到假。我諗突然出現喺佢面前，佢一定好開心！」
Jessica C.即場用麵粉搓成心形，笑言大大個心送給遠方的男友，更會預留一粒愛心湯圓給他品嘗，認真愛得纏綿。她說：「我哋因工作聚少離多，每日工作點忙碌，都會打電話或上網通話，令感情唔會轉淡，繼續保持新鮮感。中國人有句話叫『小別勝新婚』嘛！」
拒做未婚媽媽
問到可有想過今年結婚？Jessica C.坦言正努力賺錢為日後生兒育女作打算：「依家仲未係時候，我希望三十歲前實現。（會唔會做未婚媽媽？）應該唔會啦！雖然我喺外國長大，但有一半中國人血統，思想都有少少傳統。」
文：名人組