憑「警鐘胸」火速上位的Jessica C.（JC），昨日正式「收爐」，並於明日出發去意大利，與男友Sergio共度浪漫情人節，她透露帶了四萬元使費，更揚言已準備了鑽石耳環，給男友一個驚喜！
戀愛大過天的Jessica C.，與男友Sergio拍拖兩年多，恩愛如昔，她趁大年初一是西方情人節，早已安排飛赴意大利會合男友，昨日完成農曆新年前最後一項工作，便正式「收爐」，明日飛赴意大利展開兩星期浪漫之旅。昨日JC出席活動時，提起男友甜到入心，更大方表示已準備好情人節禮物。
三月初復工
一身高貴打扮的JC戴上千萬鑽飾行騷，行頭十足，原來她的情人節禮物，亦是購買一對鑽石耳環，為貪靚的男友製造驚喜，她又鬼馬地表示視自己為一份好禮物，認真甜到漏。問到她何時復工？她透露三月初才返港搵銀。
JC前晚與莊思敏及Ana R.出席另一首飾品牌活動時，提起今次旅行，她表示準備帶四萬元作使費，屆時會租一輛車，與男友四圍遊覽，問到會否花錢在男友身上？她說：「都會o架，佢有時都會畀番錢，（一般女仔都用男友錢？）如果男友成日畀，我覺得唔好，我鍾意AA制，攞番個平衡，我男友嘅前女友唔畀錢，成日要佢畀，我就會自己畀。」
阿Yu想生仔
前晚同場還有新婚夫婦周永恒和趙梓淇（前名趙頌茹、Yu），剛宣布有喜兩個月的阿Yu，全程獲丈夫細心護肚，問到她佗B心情，她說：「呢排好緊張，今日仲有啲驚，因為我有咳，但又唔見嘔，嗰時驚冇咗個BB。（想生仔定女？）我想先生仔，感覺勁啲。」
文：專案組