關心妍（Jade）首年以楊太身份度歲，為顯其賢妻本色，她狂掃高檔海味，打算親自下廚炮製團年飯，且早已設計好意頭菜式，重點推介是秘製雞燉翅湯，包保提高老公精力，有助造人成功。
年近歲晚，初歸新抱Jade忙辦年貨，為第一年以楊太身份過年做足準備。日前她到有「鮑魚王子」之稱的周國賢（Endy），位於西環的海味舖，買鮑魚、花膠、海參及燕窩等高價食材，以作煮團年飯之用。一身闊太味的Jade甫到海味舖，Endy和員工即上前迎接，以貴賓式款待。
獲Endy厚待
當Jade看見大如童裝廁板的花膠時，即雙眼發亮，一手執起巨型花膠狂索，大讚：「嘩，好有花膠味呀。」之後又睇海參，又執燕窩及魚翅，瘋狂程度如掃名牌貨。當看見疊成小山般的罐頭鮑魚時，頻說要買幾罐，準備煲鮑魚湯。而Jade最開心是得到Endy送贈折扣特級VIP卡，當兩人如頒獎般進行移交儀式時，Jade笑到四萬咁口說：「老公，我得咗，終於搵到着數啦。」Endy亦騎騎笑說：「老婆，我又得咗，終於搵到人笨啦，我講笑咋，嘻嘻。」
做個好媳婦
經過半小時血拼後，買到不捨得走的Jade，被助手以另有工作要趕場為理由催促離去，見Jade放下一大疊金牛，雙手挽住兩大袋戰利品滿足地離去。Jade不諱言今個農曆新年別具意義，作為好老婆、好媳婦，她決定在年三十晚大顯廚藝，約齊媽咪和奶奶食團年飯，她說：「我已經諗定整咩餸，我至叻係煲雞燉翅同鮑魚，好味又補身，人人食過都讚好，入廚對我絕對無難度。」
採訪：音樂組