佘詩曼早前被指硬搶廖碧兒男友陳豪，兩女更隔空互寸，而兩位「情敵」原定昨日出席《72家租客》宣傳，但碧兒竟臨時缺席，擺明避開阿佘。
佘詩曼被指因與陳豪拍攝電視劇《公主嫁到》而擦出愛火，盛傳男方以咖啡攻勢背住女友廖碧兒成功奪得「佘」歸，慘被遺棄的碧兒即作出反擊，不甘被指摘的阿佘亦不輸蝕隔空開火還擊，夾在中間的陳豪相當無奈。由於阿佘及碧兒有份客串電影《72家租客》，昨日《72》一眾演員在奧海城舉行宣傳活動，通告印有出席者名單，當中包括阿佘及廖碧兒。
開工唔想見陳豪
不過，活動一直未見碧兒蹤影，似乎有意避開「情敵」阿佘，難怪阿佘以勝利者姿態現身，並大講風涼話：「初一至初三休息，初四就要開工。（初四就見到陳豪？）唔知有冇佢份。（唔想見佢？）最好唔好見住，唔好煩。」問到新年會否到陳豪家拜年？阿佘大發嬌嗔說：「問啲咁嘅嘢，好唔正常。」
對於廖碧兒臨時甩底，無綫發言人說：「佢話要三點幾先到，但我哋已經出車去巡遊，所以佢唔會嚟。」而同場的無綫高層樂易玲大讚愛將徐子珊在電影《錦衣衛》中打得好好。
咁多宣傳去唔晒
另外，避「佘」成功的廖碧兒，昨日身穿由媽媽親手縫製的賀年衫，到秀茂坪商場出席賀年活動，問到是否為避阿佘而缺席電影宣傳？她藉詞說：「唔會，我都唔知阿佘會出席，因為呢個活動一早應承咗，《72》啲宣傳通常都好臨時，同埋咁多宣傳都冇可能去晒。」她更拉學友落水說：「學友之前都去唔到廣州宣傳啦！」並表示不會介意與阿佘同時出席活動。碧兒又透露近期工作多多，情人節也未知要不要開工，問是不是連陳豪也未必能約她過節？碧兒說：「冇o架喇！自己都約唔到自己呀，好多工作、好忙呀！」
對於碧兒避席活動，緋聞男友陳豪接受電話訪問時表示毫不知情，因他現正忙於拍攝劇集《公主嫁到》，他又說近期忙拍劇，和碧兒沒有聯絡。再問他對兩女爭風呷醋一事？陳豪就覺得緋聞只是煲水新聞，得啖笑。
文：音樂組