岑潔儀早前高調捧陶喆演唱會場，想不到對方會憑歌寄意，暗寸有人「設計」借緋聞上位，雖然Zoey事後表示不會對號入座，但日前又有報道指她與另一位廚房妹陳宛蔚有曖昧關係，在海旁談心，期間更掃背、瞓大髀兼頭貼頭，狀甚親暱。問到是否轉「性」？Zoey哈哈大笑說：「我同男仔女仔都可以做好朋友、都啱玩。但我同宛蔚只係好朋友，呢排好多唔開心事發生，所以搵佢傾訴吓。（有冇女仔追過你？）都有試過，有時都覺得女仔較明白女仔。」

Zoey坦言和陶喆「心照」。

Zoey自爆曾有女性追求者，但現階段只專心事業。

身邊多小人

知名度大增的Zoey承認今年工作量大增，但卻換來連串是非，她笑言要在農曆新年前做spa洗走所有衰氣，她說：「今年係人生中最黑仔一年，除緋聞外，仲有恐嚇SMS、床照，依家又話斷背，好似身邊小人特別多，遲啲要同阿媽去拜神，祈求新一年一切順利。（唔開心陶喆暗寸你？）我唔覺得係講我，呢啲係佢嘅幽默感，大家係朋友，心照啦！」

沖涼一個鐘

Zoey表示一向鍾意洗白白，平時沖涼至少沖一個鐘，她笑說：「阿哥成日笑問我個身係咪有老泥？但女仔貪靚冇辦法，平時最鍾意浸浴缸，會放啲牛奶或礦物鹽，可以令自己放鬆，浸得多皮膚都滑啲。」

文：專案組