Lynn與Angelababy昨日出席時裝店b+ab活動，介紹自家設計的虎年慈善tee，Lynn原本細心講解設計意念，當被問及「焚城招數」的報道時，態度即時變得嚴肅，指有關報道失實：「同事睇咗後話我知，點解一篇電影宣傳會變成咁？我唔開心，因為失去信任，以後唔知點做訪問，驚再同佢（該雜誌）做訪問。」
情緒崩潰
Lynn承認單看標題已驚慌及不悅，她更愈說愈激動：「我可以唔答嘅就唔答，唔知點解第一次做訪問會講咁多嘢。」當問到是否受委屈時，Lynn情緒開始崩潰，突然雙眼通紅，惟仍強忍淚水，試圖繼續受訪，但始終心情難以平復，她即擰轉面背向記者，最後匆匆走到店舖角落迴避，只見她身軀微微抽搐，確是我見猶憐！
面壁一分半鐘後，Lynn情緒稍為平復，縱使淚盈於睫，仍專業地完成訪問，問她是否怕影響與城城的關係？她說：「唔係呢啲原因。（被人屈而感委屈？）係。（被針對？）點解可以講一套做一套。（報道扭曲？）好多嘢都冇答過。」至於會否採取法律行動，她說未有認真看過全篇報道，待消化內容後才再考慮，但承認是次傷害甚大：「以前唔好嘅報道都只係幾句，但今次真係好多，好似個專訪咁。（要澄清？）好多都加咗好多嘢上去。」問到會否在家中哭？她扁嘴並語塞：「我……都唔知。」不過，Lynn仍恭喜城城入圍角逐金像獎最佳男主角，雖然未知是否有預祝活動，但會致電恭喜，並讚城城做得好。
炮製浪漫
Lynn受委屈飲泣落淚，憐香惜玉的城城較後時間即趕到中環買禮物氹佳人，昨午五時許，城城在男助手的陪同下，到中環雪廠街Hermès選購浴袍、毛氈及香水等，十五分鐘已有斬獲，並由助手代拿戰利品，而城城離開店舖時正傾電話，心情靚絕的他忙中依然向記者打招呼。問他知否Lynn受屈落淚以及是否出招氹對方？城城只笑而不語，但問到是否揀選情人節禮物？他笑說：「過年o架！」當記者表示年初一亦是情人節時，城城隨即冧笑並登車離開。此時，記者看到城城的座駕內早已放有朱古力花，加上剛在名店購買的浴袍等精品，相信他正為Lynn炮製一個浪漫情人節，定可博得紅顏一笑！
文：專案組、追蹤組