容祖兒及古巨基帶領群星演出英皇十周年演唱會，屆時百變祖兒將演真人騷，在台上極速換衫，預言定性感兼刻意走光，全情豁出去；而英皇為慶祝Twins踏入十周年及正式合體，獲委任當壓軸，祖兒和基仔要讓路。
「英皇盛世10周年巨星演唱會」將於本月廿七日假澳門舉行，昨日祖兒、基仔、泳兒、鍾舒漫、洪卓立、陳偉霆、關智斌及張致恒齊齊出席記者會，而Twins及謝霆鋒因有工作在身未能到場。
基仔8分鐘串燒
祖兒及基仔在演唱會中會以紅、白兩組組長身份帶領群星傾力演出，祖兒會在台上香艷換衫，基仔則演唱長達八分鐘的英皇勁歌金曲串燒歌，鍾舒漫扮「性感女神」葉玉卿、泳兒和陳偉霆跳超辣身舞，而關智斌及張致恒笑言會吞劍、跳火圈大玩雜技，謝霆鋒、杜汶澤及張家輝任評判。
祖兒以「好激」形容自己的演出，她說：「會喺台上換衫，好似變臉咁變身換出多個極端造型，將我百變形象擺上舞台，（係咪學百變梅艷芳？）唔可以咁講，sexy就少不免，但唔係重點，（怕唔怕走光？）如果走光都係特登囉。」在旁的英皇唱片及藝人管理部總監霍汶希（Mani）即插嘴說：「祖兒會露『菠……蘿蓋』。」祖兒即抗議：「好爛（gag）呀。」祖兒還說會和司儀王祖藍合作一part「兒時回憶」。
至於基仔就提議比賽落敗者要接受大懲罰，如飲啤酒溝維他奶或罰被踢屁股。去年加盟英皇的他，可會自掏腰包捐錢作抽獎？基仔「慷慨」謂：「預咗一百幾十……蚊走唔甩，我好想，不過Mani拒絕咋，惟有改派重手利是。」
Twins合體壓軸
Mani透露因Twins四月舉行演唱會，故曾考慮應否安排Twins演出，但今年是Twins踏入十周年兼真正合體，實在值得慶祝，故祖兒及基仔也要讓出壓軸位給Twins，改為打頭陣，又因Twins太忙，僅得幾粒鐘綵排，因此只可唱慢歌。
採訪：音樂組