周啟邦病逝，好友均大表惋惜，大家都對他的風趣幽默難以忘懷，又讚他是Ball場典範。
蘇蔡潔蓮（信和集團商場推廣總經理）：「前日（七日）仲同Brenda傾過電話，好突然，我同邦哥喺ball場認識，係最真心嘅朋友，佢對我非常好，好錫我，我哋曾經試過兩次出埠旅行。試過一次去ball扮嘢，我扮王后，佢扮王帝，依家佢仲叫我做王后。」
謝賢：「我同佢識咗好多年，但唔算太熟，收到呢個消息都覺得好可惜。佢為人好和藹可親，好好人。我都好耐冇見佢，通常都係報章上見到佢，希望佢家人節哀順變。」
夏韶聲：「我哋識咗廿幾年，佢太太好鍾意唱歌，所以我哋更加friend，幾年前佢哋去羅省時仲探過我，最後一次見佢哋係07年演唱會，佢哋嚟捧場仲送花畀我，呢兩、三年就少聯絡。大家一場朋友，估唔到佢咁快走。」
丁子高：「我同Uncle和Auntie（周啟邦伉儷）都熟，婚宴（周國豐）嗰日我放低賀禮就走，都見到Uncle，知道消息真係好突然。」
江欣燕：「我爸爸以前同周Uncle係朋友，所以我六、七歲就已經識佢，去過佢屋企開派對，有次仲係小朋友嘅時裝表演，仲記得佢屋企個廁所係金色嘅。不過我哋都好耐冇見，Uncle好funny，我好唔捨得呢個Uncle，好懷念佢。」
郭秀雲：「每年我都會喺君悅搞萬聖節派對，周啟邦年年都會扮嘢出席，只係上年我太忙冇搞到。我覺得做人最緊要開心，唔好令人唔開心，佢就做到自己開心，身邊人都開心。」
區詠梅（公關公司老闆）：「上年去邦哥個仔的婚宴時，佢拖住我隻手，好親切咁叫我一聲『妹妹』，見到佢都知佢好攰，話之後約出嚟食飯，估唔到佢病情咁嚴重。」