名模楊崢近年已經好少行騷，有個富貴法籍男友嘅佢當然疊埋心水做少奶奶。早幾日八太見佢孤零零一個人行街時，心神恍惚之餘仲鬼咁大懵，將個手袋周圍放，之後仲狂掃十幾盒退熱貼，唔通掛住男友掛到發高燒？
楊崢近呢幾年都好少行騷，加上佢又同拍咗成兩年幾拖嘅法籍男友Patrick感情穩定，更加疊埋心水等嫁人。一向鍾意周遊列國嘅楊崢，近年主持過唔少旅遊同飲食節目，前排佢仲歐遊近半年，為推出新食譜搜集資料。
冇厘心機
楊崢去咗歐洲咁耐，最近難得返咗香港，當然要出動行吓街，前幾日下晝四點幾，八太就見佢一個去咗中環ifc，可能身邊冇法籍男友Patrick陪住，素顏上陣嘅楊崢冇乜心機，係咁意行完一輪名店就走人。之後佢喺商場撞到女友人，兩個企喺度吹水成十分鐘先各自走人。
手袋亂放
楊崢之後又一個人去咗餐廳，但係佢就好鬼大膽，將個手袋放喺櫃枱後，自己就走咗去揀食物，對香港治安投信心嘅一票。楊崢食飽飽繼續喺餐廳上網，不過呢次佢就醒喇，將個手袋放正喺電腦隔籬，起碼都喺自己視線範圍之內。
楊崢上完網，急急腳走入一間連鎖藥房，拿拿聲走去揀退熱貼，見佢踎喺度左摷右摷，仲索性將手袋放埋落地慢慢揀，店員睇見就畀咗個購物籃佢，楊崢二話不說執咗成十幾盒、每盒$24.9嘅退熱貼落購物籃。入咁多貨，唔通楊崢掛住男友Patrick掛到發高燒？