孫耀威雖然父系是客家人，但他卻將母系的潮州當作鄉下，在潮州的大地上，他經歷了婆婆離世的傷痛、經歷了「斷背版」《鐵達尼號》的玩樂，用笑與淚交織成回憶。
「因為細個跟公公婆婆住，屋企講潮州話，耳濡目染下，自己聽明九成，識講四、五成，啲人以為我係潮州人多過客家人。」由於母系在潮州位列五大中醫之一，每次返鄉探親，鄉親父老都當作是大事迎接，反而令孫耀威（Eric）雙親一步一驚心：「可能樹大招風，每次返潮州父母都好保護我，驚畀人綁架。」
重演經典
Eric將潮州視為故鄉，留下不少開心回憶：「潮州嘅西湖好靚，記得當年《鐵達尼號》熱播，我同表弟喺艇仔模仿經典場面，十足搞基一樣！」走紅後的Eric每次返潮州都會惹起哄動，他說：「佢哋叫我做『潮州靚仔』，舊年喺西湖搞歌友會，橋上塞滿人，公安驚暴動唔畀我上台，自己惟有第二日上電視台向fans道歉。」
歡笑背後亦隱藏了淚水， Eric表示：「婆婆當年突然過身，當時我喺橫店拍緊《江山美人》，我同劇組請假，但因為拍攝唔可以延期而唔獲批准，當時好唔開心，邊拍邊喊，劉曉慶見我咁難過就幫口求情，結果可以漏夜趕返潮州奔喪，翌日完成喪禮即趕返橫店，算是可以送婆婆最後一程。」
見證進步
Eric從小已經常到潮州，見證當地的改變，由兒時玩牛屎塞炮仗，到現今經濟起飛，他直言大感驚嘆：「記得細個時啲車站好簡陋，有年紅磡火車站塞滿二萬人，逼到抖唔到氣，辛苦到喊出嚟，爸爸即刻抱起我騎膊馬，先可以再呼吸。」講到返鄉難忘事，Eric不得不提曾遭搶劫：「因為返到潮州要再坐幾個鐘車先到鄉下，我哋開車窗吹風，點知有賊伸手入嚟搶嘢，搶咗我帶畀表哥嘅羽毛球拍。」
文：音樂組