雖然四大唱片歌手在勁歌總選捧蛋，令賽果備受爭議，惟無綫堅拒四台開會，結果「傳媒大獎」惟有照頒，目前走勢祖兒暫以14獎力壓只有11獎的Eason，消息指環球雖想盡最後努力幫Eason在港台頒獎禮上爭獎，務求和祖兒分享「傳媒大獎」，惟3個獎項之距實在欲追無力，事關兩人在多個獎項上都打成平手，各有所得。

祖兒將撼低陳奕迅勇奪「傳媒大獎」。	獨攬四獎的Eason領獎時非常狼狽。	Sherman憑《給自己的信》再奪歌曲獎。

英皇再擸15獎

據知，祖兒和Eason將各奪一首十大金曲獎，兩人還各擸4個歌手獎，包括：「最優秀流行男/女歌手大獎」、「全年最高銷量男/女歌手大獎」、「優秀流行歌手大獎」及「全國最佳男/女歌手獎」，另Eason還會憑《七百年後》獲「全國最佳中文歌曲獎」。至於「全國華人至尊金曲獎」則是《七百年後》與祖兒《搜神記》之爭，雖然目前仍未知鹿死誰手，但就算Eason攞埋「至尊金曲」，在獎項總數上仍輸給祖兒，故祖兒順理成章三度勇奪「傳媒大獎」。

泳兒與海鳴威憑歌曲《我的回憶不是我的》奪得合唱歌曲大獎。

陳偉霆憑《今天終於知道錯》奪獎。

前晚，祖兒和Eason在SINA MUSIC頒獎禮上再度交手，各擸4獎成為男/女歌手大贏家，英皇共獲15獎稱霸樂壇，四大的環球和華納則各獲7獎。榮獲「我最喜愛女歌手（香港）」、「我最喜愛至尊金曲」等4獎的祖兒，穿上Blugirl紅色露肩裙登場，記者指她是大贏家，祖兒風騷說：「係呀，所以今日着紅色賀一賀。」

寸情人節冇禮

對於「傳媒大獎」會照頒，祖兒聞言難掩喜悅心情，全程喪笑：「係呀，睇報道Eason話死心，好難先贏到佢㗎。（今年咪贏佢？）望就咁望，不過一日未頒唔好講到似層層，可能會冇。（恨唔恨？）都OK，係一個嘉許，唔會唔想要，我咁謙虛。」問攞獎點慶祝？祖兒在Eason「傷口」上灑鹽，風騷說：「佢攞咗咁多年，應該冇位擺，我幫輕吓佢，所以叫佢請食飯。」

而Eason得悉祖兒攞獎仲要他請食飯，寸爆還擊：「請，冇所謂，請佢食老麥（麥當勞）最貴個餐，隨便加大，送埋情人節特別版畀佢，都知冇人送畀佢。」說罷仲抵死發出「殊殊」聲，唔畀祖兒知。另有傳環球歌手將亮相亞視，Eason說：「唔知，未收到公司通知，去邊都係咁，最緊要音響好。（廣管局調查無綫合約壟斷？）呢個題目上只有一個答案，所有嘢大家睇闊啲。」

採訪：音樂組