女子組合Cream解散後，成員李蘊（Renee）留樂壇發展，剛滿十八歲的她去年單飛出唱片，本應是今年頒獎禮候選，但她自言是家中經濟支柱，為接騷決定退出各大頒獎禮，空出檔期孖住同門師妹「E Cup Baby」劉欣宜登台搵真銀。

李蘊獨自搭巴士到鑽石山返工。	李蘊為搵錢，仲要做埋搬貨。	李蘊忙到只可以食麵包醫肚。

幫手搬貨

Renee搵錢果然不手軟，日前發現她獨自搭巴士到鑽石山荷里活廣場童裝店，她不但親自搬貨，還跪地氹細路和將童裝上架一腳踢，幾個小朋友在店內吵鬧，期間有幾個一、兩歲的ＢＢ奔跑又扭計，Renee出動零食及玩扯大纜氹他們，結果自己跌倒地上。

麵包頂肚

忙到氹氹轉的Renee，連午飯都冇時間食，要在店裏捱麵包頂肚餓。待她稍事休息，記者即上前訪問，Renee一臉愕然，否認在店裏當售貨員，她說：「其實呢間童裝店係我朋友開嘅，要拍廣告所以搵我做形象指導，我唔係喺度做sales！（見你搬貨喎？）老闆行開咗，我幫吓手啫！」她坦言酬勞滿意，又說：「趁後生想搵多啲錢，其實屋企都唔止我一個搵錢嘅！」

文：專案組