古天樂、鄭中基及黃百鳴昨日到旺角行人專用區，為賀歲片《花田囍事2010》造勢，吸引逾百市民圍觀，雖然旺角掟鏹水狂徒仍未落網，但三人揚言冇有怕，自稱十年冇踏足旺角的古仔，更賣大包應承給現場女觀眾錫錫。
古天樂昨日下午率領鄭中基及黃百鳴，以全男班陣容到旺角街頭宣傳下月上映的賀歲片《花田囍事2010》，古仔應大會要求向台下拋繡球，選出現場觀眾上台攞禮物，但鄭中基及黃百鳴為搞氣氛竟說：「禮物係錫古仔一啖。」古仔聞言即面露尷尬之色，並隨即反擊：「選到男仔就錫鄭中基。」不過搶得繡球的女觀眾卻比古仔更加怕醜，主動要求與古仔握手代替錫錫。
會祝賀女友獲獎
古仔事後表示並沒因鄭中基及黃百鳴爆肚而感尷尬：「唔尷尬，有乜好驚，頂多咪錫！我都有成十年冇嚟過旺角，今日幾熱鬧吖，好配合我哋套賀歲片，黃百鳴老闆對套戲嘅票房有信心，我都一樣有信心。（年初一情人節點過？）冇乜特別，喺屋企拜年。」
鄭中基則笑言比古仔優勝，他說：「我幾耐冇嚟旺角？唔係好耐，三個零月左右，我成日落嚟睇模型槍，（使唔使喬裝？）唔使，我去慣去熟。（情人節有乜節目？）屋企人去晒旅行，我留守屋企等人嚟拜年。（有冇祝賀緋聞女友蔡卓妍《勁歌金曲》攞獎？）我錄低咗未睇，我會祝賀佢，但未打電話畀佢。（點睇林峯攞「亞太最受歡迎男歌手」？）我返去睇咗再講。」
對票房信心十足
黃百鳴對《花》片信心十足說：「有信心可以破《家有囍事2009》紀錄，（唔怕《阿凡達》搶走觀眾？）到時要睇《阿》片嘅已睇得七七八八，新年一家大細開心吓，我哋連鏹水都唔驚，特登揀最旺嘅地方做宣傳。」
文：影視組