Eason昨日在活動上被問到可有留意前晚無綫頒獎禮時，他抵死說由八時多開始睡覺，到十一時五十五分才睡醒，之後Eason再補充只是說笑，他整晚在家中看頒獎禮。講到祖兒前晚獨領風騷奪七個獎，令其傳媒大獎總數增至14個，看來贏硬Eason奪傳媒大獎，Eason亦擰晒頭說：「難追，應該冇希望，死咗條心罷啦！起初自己都冇乜點理，但大家講咪留意下囉，尋晚一路睇都嘩嘩聲，要多佢（祖兒）三個喎，好難啦！」
笑言多啲去廣播道
有指頒獎禮已變質，有人提議取消四台傳媒大獎？Eason則說：「每個台準則唔同，每個台都有佢立場，Who hold the flag啫（睇邊個揸旗）。」十大中文金曲頒獎禮能後來居上？Eason抵死說：「我之前百萬行又冇去，參與少咁自然陌生啲，惟有呢兩個星期去多啲廣播道先。」問到可覺林峯攞「亞太區最受歡迎香港男歌星」太快？Eason則說不了解全港或全世界的歌手受歡迎程度，但他知道林峯是受歡迎歌手。不過，Eason則心水清說早年這個獎是沒有「香港」兩字，笑言：「既然有得香港，咁會唔會有台灣或者西半山咁呢。」
「邊個拎都冇所謂」
至於「獎后」祖兒前晚與一眾英皇歌手包括蔡卓妍、泳兒、陳偉霆、洪杰、古巨基、海鳴威等出席慶功宴，講到傳媒大獎她贏硬Eason，祖兒表示：「呢個獎邊個拎都冇所謂，如果今年我拎，下年咪到佢拎囉！」英皇成大贏家，祖兒則謂：「自己絕對尊重賽果，我自己冇愧對獎項。」據知原先她奪「最受歡迎女歌星」，但無綫為捧林峯臨場調獎？祖兒沒好氣說：「哎吔，無論賽果係點，都有人猜測，反正都塵埃落定，個獎都攬住咗，唔使再諗太多，攞咗兩個金曲獎已開心到癲啦。」
另外，勁歌籌委會經理陳家揚被問到有傳「亞太區最受歡迎香港男歌星」的得主，是臨場將李克勤轉給林峯，目的是不想放生「四大」，因克勤是環球歌手，變陣下令祖兒成犧牲品？陳家揚謂傳言歸傳言，全非事實。Eason不值得獲獎？他堅稱是計分結果，分數是由觀眾投票、大會評審及音統會而來。至於網迷對勁歌頒獎禮的賽果反應熱烈，正反均有不同聲音支持和表態。
文：音樂組