江若琳（Elanne）出道第四年，公司宣布為她舉行首個演唱會，將於本月十五日踏上Star Hall舞台圓夢，Elanne坦言心情既興奮又緊張，她說：「今次係我第一個演唱會，希望做到最Perfect為止，所以呢排都日練夜練，基本上冇咩時間休息。」
五吋高踭鞋熱舞
Elanne今次更特別邀請陳慧琳御用造型師黃欐堯（Celia）擔任形象顧問，雖然個唱上約一半時間都要勁歌熱舞，但Elanne卻逃不過要着高踭鞋的命運，睇住Celia為她準備的五吋高踭長Boots，她都不禁O晒嘴，她說：「以前幾首快歌都係着平底鞋，依家行都唔識行，惟有要着住練舞先可以慢慢習慣。」
怕失六位數首飾
Elanne透露個唱的「行頭」都非同小可，單單首飾就高達六位數字，她笑言：「公司買咗保險未呀？好怕會唔見，同埋我有個動作係要拋呢個閃閃髮簪落台，睇嚟要安排個工作人員幫我接住先得。」至於一直大賣關子的演唱會服裝，Elanne表示：「今次真係挑戰終極性感，少布到幾乎淨係遮得住三點，今次真係到我底線喇，所以特別去操Fit個身形，足足瘦咗十磅有多，不過我覺得值得嘅，希望入場嘅歌迷個個都好滿意咁睇騷啦！」
採訪：音樂組`