阿嬌及William早前於大潭為杜汶澤監製新片《前度》拍攝談情戲份，最近William被指跟緋聞女友Angelababy感情生變，令原本性格開朗的William在片場內變得滿懷心事，更經常流露出一副悶爆表情。身為同門師姐的阿嬌見狀，便主動跟William談天說笑，務求令William開心番，得到師姐如此照顧，William心情慢慢轉好，變回昔日「開朗男」。

William在艇上跳來跳去取暖。	阿嬌演技進步不少，拍攝喊戲更一take搞掂。	杜汶澤親身上陣演爆樽戲。

天冷抱膝取暖

阿嬌成功令William心情變好，拍談情戲當然更加得心應手，杜汶澤見兩人如此有默契，遂立即為他們加戲，特別安排兩人坐小艇到對面小島，拍多一場望海談情戲。

拍攝當日氣溫只得十度左右，不過阿嬌與William拍攝的是夏天戲份，兩人穿的戲服十分單薄，William在等埋位時，不時要跳來跳去來取暖，阿嬌則較耐寒，只是抱膝取暖。

拍喊戲快靚正

另外，杜汶澤昨日在其網誌中放了不少昨日鍾欣桐在鯉景灣拍攝《前》片的劇照，當中還有杜汶澤被爆樽，血流披面的相片，記者致電杜汶澤，他表示：「尋日係拍一場阿嬌嘅喊戲，佢未埋位時，先喺車上培養情緒，之後一落車就開始拍，因為『快靚正』所以導演都一take收貨！（你點解會演爆樽戲？）劇情講我溝唔到阿嬌，仲畀人爆樽，呢啲溝唔到女又被人打嘅戲，冇人肯演，惟有自己演番啦。」

文：影視組