志偉解釋有感電視演員拍戲而未能跟足市價，他只是想表達希望影圈頻頻有工開，電視演員的酬勞能夠相對地提高而已：「我深信《7》片內冇一位演員冇錢收，反而比拍TVB節目酬勞更高，一線演員好似張學友一定收足。拍《7》片大家好似一家人咁，我仲諗住幫TVB再拍多兩部大製作，相信最快五、六月可以成事。」

至於他的言論在有線節目內，與四大唱片公司跟無綫交惡混為一談，志偉表示不清楚，但補充：「好似學友咁分得好清楚，電影宣傳佢一定做，但唱片嘅嘢佢冇理由要做二五仔嘅。可能外國唱片公司有自己嘅一套，TVB亦有佢嘅理由，總之最傷嘅係新進歌手，因為分到幾多錢唔會入佢哋個袋，相反仲少咗plug歌嘅機會。」至於女兒曾寶儀與周渝民傳緋聞，志偉則笑指二人「冇乜可能」，但只要女兒喜歡，他絕對無所謂。