與廖偉強譜忘年戀的袁小曼，情到濃時竟接二連三做出粵語長片式懷舊動作，令人側目！
甫士1：「寶珠呂奇」式山盟海誓
廿一世紀嘅今日，袁小曼同廖偉強竟然做出應該屬於60年代嘅「四目交投」兼「手捉住手」嘅拍拖動作，娘爆程度比粵語長片主角更甚。
側目度：★★★★★
甫士2：輕撫你的臉
如果大家好記性嘅，一定記得80年代張學友隻hit歌《輕撫你的臉》，估唔到廿年後嘅今日，廖偉強都仲會用呢招冧女，仲要邊輕撫袁小曼嘅腮，邊喺額頭獻吻，認真骨痹！
側目度：★★★★★
甫士3：小寶寶、食mum mum
喺公眾地方餵食殘廢餐都已經夠難頂喇，袁小曼仲要餵到鬥雞眼咁款，呢啲咁煙韌嘅行為，係咪留番屋企做好啲呢？
側目度：★★★
甫士4：動L腳
袁小曼雖然係落選亞姐，但參選時都上過儀態同甫士班啩，知道擺甫士最緊要「型」，單腳企仲要扮嬌俏呢啲過時動作，好似留番畀黃夏蕙適合啲喎！
側目度：★★★★