憑35D巨胸打響名堂的落選亞姐袁小曼，與相差廿一年的地產代理CEO廖偉強戀情曝光後，小曼的少奶奶夢可謂出現不少暗湧，繼前日一名自稱是廖偉強妻子胞姊的梁小姐爆料指廖還未離婚後，昨日梁小姐又指「廖太」因情緒不穩需入院治療，梁小姐說：「我唔打算回應住，唔想妹妹受打擊，佢依家唔舒服要瞓醫院。」問到梁小姐突然「封嘴」是否因為受到壓力，她則以「唔想再講」為由拒絕回應。

廖偉強與袁小曼無論身在何方均十指緊扣兼表現冧爆，二人果然愛得甜蜜。	廖偉強前晚與袁小曼歎完魚翅後，即驅車直駛返二人位於北角的愛巢。	廖偉強親自駕車接送小曼去看中醫。

據知兩人同居

對於分居妻子入院，廖偉強接受記者電話訪問時，亦以私人事為由拒絕多作回應，但言談間仍流露出對分居妻子的關心：「希望傳媒幫吓手，唔好刺激佢，我希望佢安靜吓，我自己亦想低調啲。」由於廖偉強與分居妻子對於是否已離婚「各有各說法」，廖偉強昨日強調兩人已協議離婚，同時並謂已做足男人本分：「我有畀生活費佢哋，亦有供兩個仔讀書；其實我想澄清我同妻子分開咗住，09年初我已搬離貝沙灣去咗北角住。」據知他和小曼現時已是同居階段，而廖偉強亦是於搬往北角後才對小曼展開追求。

體貼地陪女友掛號。

廖偉強陪女友候診。

煲藥大晒幸福

不過揚言要低調的廖偉強，為了陪伴小曼，還是被迫「高調」面對傳媒。除了連日來與小曼以極煙韌的姿態拍拖「示眾」外，昨日小曼與應屆亞姐張加慧拍攝亞視節目《時尚生活guide》時被發現原來已咳足一個月，眼見女友病得如此厲害，他傍晚時接送女友到油麻地看中醫，期間他未能找到車位，但愛女友心切的他為免耽誤女友看醫生時間，遂將座駕隨意泊在街邊。雖然為女友要冒被抄牌之險，但他一樣無怨無悔，更第一時間標落車為女友開車門，兼拖實女友往看中醫。席間記者問經常與男友公然錫錫的小曼，怕否將自己的「久咳」傳染給男友時，她即撒嬌謂：「好似無喎又。」看完中醫後，小曼又忍不住向記者晒幸福指廖偉強會為她煲中藥，足證是廿四孝男友。

坦承過去冧爆

雖然小曼病足一個月，但她與男友的拍拖節目一樣精彩，繼早前拍得拖手逛街及甜蜜遊迪士尼外，前晚小曼又與男友到尖沙咀撐枱腳歎魚翅，認真癡纏。小曼席間更強調絕不會做第三者：「我同佢啱啱開始時，佢已經講晒佢嘅過去畀我知，我知佢單身先至接受追求，我都唔鍾意做第三者。」小曼更笑指男友主動在傳媒面前維護自己甚為感動：「佢願意向傳媒坦承過去嘅一切，令我覺得好難得同好被尊重。」

文：影視組