艾粒成員Donald（唐劍康）同Jan（張詠恩）拍拖成三年都好恩愛，早排八太就見到佢兩個鬼咁煙韌，連搭電梯嘅分零鐘都難捨難離攬到連體嬰咁款，Donald仲手口並用，對女友摸完臉又錫額頭，冤氣到暈。
艾粒成員Donald同少爺占（甄子康）平時鬼鬼馬馬口花花，但講到拍拖，八太真係估唔到兩個其實都咁專一。好似Donald咁，自從06年與同一公司嘅前Krusty成員Jan撻着之後，計計下到依家都拍咗拖成三年，上年佢兩個傳出婚訊之餘，仲被人影到雙雙返番何文田嘅愛巢添，但Donald梗係死口都唔認結婚啦，仲發揮搞笑本色，話女友Jan其實只係上佢屋企做鐘點女傭，仲畀番幾百蚊人工女朋友添。
邊行邊談情
雖然Donald口就咁講，其實佢都錫到Jan燶咁滯，邊捨得要個女朋友幫佢執屋吖。早幾晚八太就見Donald同Jan喺中環拍拖夜蒲，兩個仲煙韌到不得了，玩到十二點幾先捨得走人，離開夜店嗰陣，佢哋仲拖晒手邊行邊漫步談吓情，鬼咁浪漫。
打風打唔甩
直到搭電梯去停車場攞車時，Donald仲慌死女友會跌親咁攬到佢實一實，兩個又愈攬愈㷫，情到濃時Donald手口並用，好溫柔咁輕撫完Jan塊臉又摸佢額頭，跟住當然出口啦，見Donald嘴嘟嘟對Jan連環錫，連搭電梯嗰分零鐘都癡纏成咁，睇怕佢兩個真係打風都打唔甩。反而少爺占就要學吓嘢喇，早排見佢同女友Tina食飯時都搵成班朋友做電燈膽（下圖），應該二人世界增進感情先啱㗎嘛。