記：記者 黃：黃國桐律師

記：十姑娘份聲明有律師信證明係由佢自己親筆簽名，但發畀傳媒嘅聲明上面冇十姑娘嘅簽名，會唔會被質疑法律效用？

黃：我唔會質疑，只係覺得有啲古怪，用得「signed by」就表示有發聲明者嘅簽名，通常律師Certify（證實）一份聲明屬實時，正本上一定有發聲明者嘅親筆簽名。

記：十姑娘方面解釋正本係有簽名，但為免簽名模式曝光，副本只有律師樓蓋章及律師簽名作實，解釋是否合理？

黃：我接受呢個解釋，好合理。

記：之前何東舜銘發律師信要求陳復生交還鑽戒畀基金會，但佢過期未交還，依家十姑娘再出聲明要求，如果陳復生堅持唔交還鑽戒，喺法律上十姑娘下一步可以點做？

黃：十姑娘呢個物主可以出告票要求陳復生交還鑽戒，如果陳復生再唔執行交還動作，到時就會被傳召上法庭答辯。

記：事件鬧上法庭嘅話，十姑娘需唔需要喺法庭上親自露面？

黃：唔需要，到時佢嘅律師會拎住十姑娘發嘅呢份聲明上庭，冇人懷疑聲明屬假嘅話，佢都唔需要出庭，道理同遺囑嘅法律效用一樣。