佘詩曼、陳豪挾《宮心計》餘威，聖誕接騷接到手軟，齊齊落力搵真銀，阿佘更坦言明年大計是買樓置業。
平安夜晚阿佘、陳豪、EO2及石修出席公開活動，落力與fans玩遊戲，帶動全場熱鬧氣氛，期間阿佘獲fans獻花，陳豪則走入觀眾區握手，兩人大受歡迎，並親熱地示範餵食糖蓮子。
未收嘉穎禮物
阿佘坦言喜歡節日開工，可以賺更多錢之餘亦更加熱鬧，至於來年願望便是買樓置業，她說：「其實今年一路都諗住喺香港區買樓，但樓價太高，咁我又唔急嘅，睇明年會唔會低番啲，可以賺多少少。」問到可有收到緋聞男友鄭嘉穎的禮物，她說：「冇喎！上年都冇，我都冇時間去買禮物，日日趕拍戲。」
陳豪告別夜蒲
陳豪表示今年挾《宮心計》的威勢接了不少工作，當紅的「柴九」黎耀祥亦有分一杯羹，問會否送聖誕禮物給緋聞女友廖碧兒？他說：「會補送禮物，送咖啡多，我鍾意飲咖啡，都鍾意送咖啡。」活動後他會陪媽媽食聖誕大餐，因為他早已告別夜蒲年代：「曾經有段日子晚晚蒲到凌晨，但突然間有日靈光一閃，完全戒咗，人大咗追求實在啲嘅嘢，希望時間用得有價值啲。」
文：影視組